(NI KEVIN COLLANTES)
MAGANDANG balita para sa mga guro dahil pagkakalooban sila ng pamunuan ng Metro Rail Transit Line 3 (MRT-3) ng free rides bukasm Oktubre 5, kasabay nang pagdiriwang ng National Teachers’ Day.
Batay sa inilabas na advisory ng Department of Transportation (DOTr), na siyang nangangasiwa sa operasyon ng MRT-3, bahagi ito ng kanilang pakikiisa sa mahalagang okasyon at bilang pagpupugay na rin at pagkilala sa sakripisyo at pagseserbisyo ng mga guro para sa bansa.
Ayon sa DOTr, ang libreng sakay ay maaaring i-avail ng mga guro mula 5:30 ng umaga hanggang 10:30 ng gabi ngayong araw.
“Makalilibre ng sakay sa MRT-3 ang mga minamahal nating guro buong araw bukas, ika-05 ng Oktubre 2019, mula alas-5:30 ng umaga hanggang alas-10:30 ng gabi!” anunsiyo ng MRT-3.
Kinakailangan lamang umano ng mga guro na magprisinta ng kanilang Professional Regulatory Commission (PRC) o kaya ay kanilang Faculty ID sa mga station personnel sa service gate ng MRT-3 upang maka-avail ng libreng sakay.
Ang MRT-3 ang siyang nag-uugnay sa Taft Avenue, Pasay City at North Avenue, Quezon City via Epifanio delos Santos Avenue (EDSA).
![](https://saksingayon.com/wp-content/plugins/dp-post-views/images/eyes.png)